• Historiku
• Ekipa
• Programet
• Financat

• 2009
• 2008
• 2007
• 2006
• 2005

• Fotografi
• Artikuj
• Promo

• Publikime
• Shkrime

• Donatorët
• Lidhje

Aktivitetet 2007

Rrugët e Ferizaj ende pa ‘’emra zyrtarë’’
INPO përmes një reagimi të adresuar te Kryetari i Kuvendit Komunal kërkoi që sa më shpejt të bëhet vendosja e pllakateve ose shenjave që zyrtarizojnë emrin e një rrugice, rruge ose sheshi sepse ky proces është i një rëndësie të veçantë duke pasur parasysh që qytetarët ferizajas ende, në fakt nuk e dinë emrin e rrugës në të cilën jetojnë.
INPO reagon ndaj rasteve të konfliktit të interesit në Kuvendin Komunal të Ferizaj
INPO përmes një shkrese të dërguar në adresë të Kuvendit Komunal të Ferizajt reagoi ndaj emërimit të Znj. Synavere Rysha në pozitën e Auditorit të Brendshëm që sipas ligjeve dhe rregulloreve në fuqi nuk është vendim i drejtë pasi që znj.Rysha është këshilltare e Asamblesë Komunale të Ferizajt dhe ky emërim paraqet shumë shkelje të ligjeve në fuqi në territorin e Kosovës. Me këtë rast u kërkua që zyrtarët komunal të jenë më vigjilent dhe t’i mënjanojnë rastet e konfliktit të interesit në këtë institucion.

Fushata ‘’Ngritja e Sigurisë në Rrugë’’
Gjatë një aksioni që ka zgjatur prej datës 17 deri më 20 Janar aktivistët e INPO-së në bashkëpunim me Njësitin për Trafikun Rrugor të SHPK-së dhe Inspektoratin Komunal për Komunikacion kanë shpërndarë fletushka informuese për qytetarët dhe kanë realizuar patrulla të përbashkëta, qëllimi i të cilave ka qenë që më për së afërmi të shihet gjendja e vërtetë e rrugëve dhe komunikacionit në përgjithësi në qytetin tonë. Gjatë këtij aksioni janë vërejtur disa dukuri shumë negative, për të cilat këto tri institucione janë zotuar që së bashku t’i luftojnë. INPO kërkon ndryshime në Rregulloren Komunale të Transportit
INPO, dërgoi në adresë të Kuvendit Komunal një kërkesë-propozim që në Rregulloren Komunale të Transportit të plotësohet edhe një klasë, e cila dikton një zbritje prej 50% për këto kategori: Familjet e dëshmorëve, Invalidët e Veteranët e luftës, Studentët dhe nxënësit e Vullnetarët, duke u bazuar në gjendjen e rëndë sociale të kategorive të lartpërmendura dhe nevojën për t’u ndihmuar atyre në mënyrë institucionale.

INPO shpreh shqetësim për punën e ngadalshme në Gjykatën Komunale të Ferizajt
Gjatë një hulumtimi të bërë nga INPO është kuptuar që puna e gjykatës në Ferizaj është shumë e ngadalshme dhe ndonjëherë jo-profesionale. Prandaj INPO dërgoi një kërkesë në adresë të Kuvendit Komunal të Ferizajt që të diskutohet për këtë çështje, pasi që shumë qytetarë ankohen për punën e gjykatave prandaj është në të mirë të qytetareve që Kuvendi Komunal që përfaqëson banorët e Ferizajt të diskutojë për këtë çështje dhe ta ngritë këtë shqetësim në nivelet më të larta të qeverisë qendrore.

INPO bashkon SHPK dhe KK për të nënshkruar marrëveshje bashkëpunimi për Sigurinë në rrugë
INPO pas një bashkëpunimi të suksesshëm në realizimin e aksionit ‘’Ngritja e sigurisë në rrugë’’ arriti që të mbledh bashkë përfaqësuesit e SHPK-së dhe KK-së që të nënshkruajnë një marrëveshje bashkëpunimi, me qëllim të koordinimit të punëve të përbashkëta dhe rritjes së bashkëpunimit reciprok në të mirë të qytetarëve dhe të rritjes së sigurisë në rrugë. Nënshkrimi i marrëveshjes u bë gjatë një konference të përbashkët për shtyp të këtyre tri palëve.

Marshi Paqësor : BOLL MA
Me moton ‘’ Boll ma Korrupsionit, frikës, dhunës, qeverisjes së dobët’’ INPO realizoi Marshin Paqësor duke marshuar rrugës kryesore të qytetit gjysmënudo.

Debati ‘mbi gjendjen e Arsimit në Ferizaj”
Duke pasur parasysh problemet e mëdha në arsimin ferizajas INPO organizoi një debat në të cilin morën pjesë përfaqësues institucionesh të ndryshme dhe nxënës të shkollave të mesme të qytetit. Siç u tha në këtë debat dhe siç ishte paralajmëruar shumë herët nga INPO-ja dhuna nëpër shkolla është në rritje e sipër çdo ditë e më shumë prandaj edhe u diskutuan mënyrat më të mira të luftimit të kësaj dukurie shumë negative.

Hulumtimi mbi ‘’Vendbanimet Jo-Formale’’
Gjatë një konference të përbashkët për shtyp koordinatori i Standardeve të Kuvendit Komunal dhe INPO prezantuan ecurinë e deritanishme të pyetësorit për vendbanimet Jo-Formale, pyetësor të cilin INPO-ja i ka ofruar Kuvendit Komunal ta kryej pa pagesë në mënyrë që të lehtësojë sadopak buxhetin e këtij institucioni. Kontributi i KK-së në këtë pyetësor ishte vetëm sigurimi i shujtës ditore për aktivistët në terren.

INPO bën vlerësimin e seancës së Asamblesë Komunale të muajit Shkurt
Gjatë një konference për shtyp INPO bëri vlerësimin e seancës së 28 shkurtit të Asamblesë Komunale. Në këtë konferencë u vlerësua se edhe kjo seancë nuk ishte ndryshe nga të tjerat dhe nuk përmbushte kriteret e një seance dhe përfaqësimi kualitativ nga këshilltarët komunal. Mirëpo kishte edhe anë pozitive dhe këtu mund të ceket miratimi i rregullores për transport urban dhe urban-periferik që ka qenë shumë i nevojshëm për qytetin e Ferizajt.

Hulumtimi mbi gjendjen e mjedisit dhe shërbimet e kompanisë ‘’Pastërtia” në Ferizaj
Gjatë një konference për shtyp INPO bëri Publikimin e Raportit të pyetësorit për Kompaninë ‘’Pastërtia’’ me udhëheqësit e kësaj kompanie. Rezultatet e këtij hulumtimi kanë synuar të kontribuojnë në hartimin e politikave më të mira të ndërmarrjes për të shërbyer qytetarin në masën më të mirë të mundshme. Gjendja e mjedisit, jo vetëm në Ferizaj por edhe në tërë territorin Kosovës, është e mjerueshme. Degradimi i ambientit, bëhet me një ritëm shumë të shpjet, i cili nuk po ballafaqohet me asnjë pengesë. Kontribuesi më i madh i degradimit të ambientit në Kosovë, është mungesa e përgjegjësisë civile tek qytetarët. Ndërsa kjo ndërmarrje u zotua që të punoj për të përmirësuar punën e saj dhe marrjen parasysh të rekomandimeve të INPO-së.

INPO përpilon Memon e Dokumentit Buxhetor për Kuvendin Komunal të Ferizajt
INPO së bashku me Drejtorin e Drejtorisë Komunale për Buxhet dhe Thesar publikuan memon e dokumentit buxhetor të Kuvendit Komunal të përpiluar nga INPO-ja, që ka qenë njëri nga 5 udhëzimet e nënshkruara nga Kryeshefi i Ekzekutivit në kampanjën për ndryshimin e buxhetit të KK-së që INPO ka realizuar në fund të vitit të kaluar. Ky dokument është i pari i këtij lloji në tërë Kosovën dhe kjo nismë është përshëndetur nga të gjitha institucionet relevante.

Debati mbi punën e Gjykatës Komunale të Ferizajt
INPO organizoi një debat të hapur me qytetarë rreth punës së Gjykatës Komunale, duke patur të ftuar përfaqësues nga të gjitha sferat e jetës dhe qytetarë, e sidomos të atyre që kanë çështje të papërfunduara në gjykatë. Pas përfundimit të debatit INPO u zotua që të përpiloj një raport nga ky debat në të cilin mund të mbështetet edhe Gjykata Komunale në përmirësimin e punës së saj.

Performansë Symbyllur dhe Gojëmbyllur para institucioneve komunale
INPO realizoi një performansë Symbyllur para Kuvendit Komunal, Gjykatës Komunale dhe Spitalit Rajonal, për të shprehur pakënaqësinë ndaj mungesës së ndërgjegjes demokratike dhe ndjenjës së përgjegjësisë nga zyrtarët e lartë të institucioneve publike. Në duart e aktivistëve ishin mesazhet: Kërkojmë Drejtësi; Kërkojmë më shumë efikasitet të punës; Kërkojmë shërbime shëndetësore më kualitative; Kërkojmë përgjegjësi më të madhe dhe profesionalizëm; Kërkojmë rrugë më të mira dhe më të sigurta; Kërkojmë mundësi më të mëdha për punësim; Kërkojmë më shumë përgjegjësi dhe llogaridhënie ndaj popullit, etj

INPO: KEK-u të ndal rritjen e çmimeve të energjisë elektrike
INPO dërgoi një letër reaguese në adresë të Korporatës Energjetike të Kosovës, filiali në Ferizaj dhe në atë të Rregullatorit të Energjisë, për të shprehur pakënaqësinë me rritjen e çmimeve të energjisë elektrike për kategorinë e amvisërisë. INPO vlerësoi se duke e patur parasysh gjendjen e vështirë ekonomiko-sociale të shoqërisë kosovare, mirëpo edhe përqindjen e inkasimit edhe me çmimet paraprake kjo nismë për ngritje të çmimeve do të destabilizonte edhe më shumë situatën dhe bëri thirrje për rishqyrtim të këtij vendimi.

INPO kërkon nga partitë politike përgjegjësi politike dhe morale
INPO përmes një letre të dërguar në adresë të Partive Politike shprehu shqetësimet rreth situatës politike që po mbretëron në qytetin tonë. Në këtë letër u kërkua përgjegjësi më e lartë politike dhe morale në këtë kohë, aq të ndjeshme sa edhe të rëndësishme për Kosovën, si dhe duke patur parasysh se ngjarjet e fundit po krijojnë një përshtypje të injorimit të plotë të qytetarëve u kërkua që të ndalet funksionimi i tregut të zi në shkëmbim të pozitave në institucionet qeveritare dhe të merret seriozisht zgjidhja e problemeve që brengosin qytetin dhe komunën tonë.

MAJFT: Tregut të Zi Politik
INPO organizoi konferencën reaguese për shtyp ‘’Mjaft: Tregut të zi politik’’ rreth ngjarjeve të fundit në skenën politike. Me këtë rast u kërkua më shumë përgjegjësi institucionale, morale dhe politike nga të gjitha partitë politike e sidomos ato të përfaqësuara në Kuvendin Komunal, ndalim të shantazheve politike dhe tregut të zi për postet udhëheqëse. Prandaj duke parë destabilitetin e krijuar politik dhe kolapsin institucional INPO bëri thirrje për njerëz të konsensusit në postet publike, njerëz që kanë një karrierë dhe prapavijë të pasur morale dhe profesionale e jo që janë të akuzuar për afera të ndryshme.

Dhuna nëpër shkolla po eskalon çdo ditë e më shumë
INPO dërgoi një letër shqetësimi në adresë të Drejtorisë Komunale të Arsimit për të reaguar ndaj eskalimit të dhunës nëpër shkollat e qytetit tonë, përkatësisht në Gjimnazin “Kuvendi i Arbrit’’ , me ç’rast janë lënduar disa nxënës, ndërsa në incident kanë qenë të përfshirë edhe prindër. Shoqëria Civile qysh para një viti kishte paralajmëruar eskalimin e dhunës dhe i kishte bërë thirrje institucioneve relevante që të marrin masa por këto paralajmërime ishin injoruar prandaj INPO edhe një herë u bëri thirrje Institucioneve Arsimore dhe Shërbimit Policor të Kosovës të sulmojnë direkt celulat nxitëse të këtyre rasteve që janë infiltrimi i bandave nëpër shkolla dhe kërkoi nga qeveria lokale, që të aplikoj programe që do të ngritin ndërgjegjen e nxënësve mbi edukatën qytetare dhe rëndësinë e disiplinës në shkollë. INPO kërkon verifikimin e pasurisë së zyrtarëve komunal
INPO ka deponuar një kërkesë në adresën e Kryeprokurorit Publik përmes së cilës kërkoi që prokurori publik të udhëzojë një hetim për të verifikuar pasurinë e zyrtarëve të lartë të Kuvendit Komunal nga viti 2000 deri më 2006. INPO mendon se pasuria e disa prej zyrtarëve të lartë të qeverisë lokale, në praktikë do të ishte e vështirë të arrihej me përfitimet financiare që marrin nga postet zyrtare që kanë. Prandaj në mbështetje të informatave për deklarimin e pasurisë së tyre le të bëhet verifikimi i pasurive

“Kacafytja e Intelektualëve”
INPO realizoi një konferencë për shtyp për të reaguar rreth ‘’Kacafytjes së intelektualëve‘’ në seancën e radhës së Kuvendit Komunal. Ky rast u cilësua si një akt shumë i ulët i këshilltarëve komunal. INPO i bëri thirrje Kryetarit të KK-së, z.Grainca që të marrë masa disiplinore edhe deri në largim nga pozita e këshilltarit të personave të përfshirë në këtë rast.

INPO kërkon zbatimin e rekomandimeve të Auditorit Gjeneral për Komunën e Ferizajt
INPO dërgoi një shkresë zyrtare në adresë të Kryeshefit të Ekzekutivit që të bëj një raport me zbatimin e rekomandimeve nga zyra e auditorit gjeneral që i ka bërë gjatë fazave të auditimit të zyrës së prokurimit dhe dikastereve të tjera të qeverisë lokale, ngase një raport i tillë do të ishte shumë i rëndësishëm për të parë më afër se sa janë përmbushur ato rekomandime dhe çka është e nevojshme për t’u bërë me qëllim të përmbushjes së tyre.

Kryetari Grainca të ndal favorizimet
Gjatë një konference për shtyp INPO reagoi ndaj favorizimeve të Kryetarit me rastin e masave disiplinore ndaj këshilltarëve të përfshirë në rrahjen e 12 Prillit, ku INPO shprehu keqardhjen dhe pakënaqësinë e thellë me letrën e kryetarit Grainca dërguar PSSP-së, me ç’rast ai ka bërë edhe një shkelje tjetër duke mos u konsultuar fare me Komitetin për Politikë edhe Financa, dhe vetë ka bërë identifikimin e deputetëve të përfshirë në rast. ‘’Kryetari ka shprehur një favorizim dhe ndarje të qartë që edhe një herë e shpreh mungesën e dëshirës dhe vullnetit për përgjegjësi dhe kalim të këtij kaosi dhe vakumi institucional – ‘’ u tha në këtë konferencë.

Takim me Kryeprokurorin Komunal të Ferizajt
INPO u takua me Kryeprokurorin Ekrem Shabani në zyrat e saj, për të diskutuar për kërkesat e parashtruara së fundi nga INPO si atë për verifikimin a pasurisë së zyrtarëve të lartë komunal verifikimin e investimeve kapitale që janë bërë në komunën e Ferizajt në veçanti nga donatorët ndërkombëtar, pasi që në bazë të disa të dhënave ekziston mundësia e keqpërdorimit të investimeve nga ana e donatorëve ndërkombëtarë duke manipuluar me shumat reale të investimeve.

Takim me Kryetarin e Gjykatës Komunale të Ferizajt
INPO është takuar me kryetarin e gjykatës komunale z. Rifat Abdullahu, për të diskutuar rreth shqetësimeve që INPO ka rreth funksionimit të sistemit të drejtësisë dhe për çështjet e ngritura nga debati i realizuar për punën e gjykatës, me ç’rast Kryetari ka ofruar zotimin për të shqyrtuar seriozisht problemet e ngritura. Gjithashtu, INPO ka diskutuar edhe për propozimet për ngritjen e dy padive ndaj dy institucioneve publike, të cilat gjatë javës në vijim janë bërë publike.

Perfomansa: Kërkojmë punë dhe respektimin e të drejtave të punëtorëve
INPO gjatë një perfomanse simbolike bëri pastrimin e hapësirave publike, duke dashur të tregoj se 1 maji nuk është një ditë për të festuar, sepse ne në fakt po festojmë në ditën kur duhet që më së shumti të kërkojmë punë dhe respektimin e të drejtave të punëtorëve të cilat janë të shtypura nga punëdhënësit e tyre. Në Kosovë, ku ka më shumë se 50% Të pa-punë dhe ku punëtorët si të sektorit privat, të atij publik por edhe punëtorët që janë të angazhuar në disa nga organizatat ndërkombëtare, nuk gëzojnë të drejtat e tyre, për të cilat sot shumica e qytetarëve festojnë.

INPO kërkon të ngrihet padi ndaj dy institucioneve Publike
Gjatë një diskutimi me Kryeprokurorin Publik, INPO deponoi një kërkesë për ngritjen e një padie ndaj Qendrës Rajonale të Administratës Pensionale, për mos zbatim të vendimit të Gjykatës Supreme dhe një padi tjetër, Drejtorisë Komunale të Inspekcionit për moskryerjen e detyrës, duke vlerësuar se ngritja e mundshme e këtyre dy padive, në veçanti ndaj Drejtorisë së Inspekcionit është shumë e rëndësishme për përpjekjet e ndërtimit të shtetit demokratik dhe sundimit të ligjit.

Kuvendi Komunal të ndërpres ndërtimin në oborrin e çerdhes së fëmijëve "Ardhmëria Jonë"
INPO ka depozituar një shkresë në adresë të Kryeshefit të Ekzekutivit z.Dukagjin Etemi, për të kërkuar ndërprerjen e punimeve në oborrin e çerdhes së fëmijëve "Ardhmëria Jonë". Duke vlerësuar se "Lejimi i ndërtimit në oborrin e një institucioni edukativë, me një rëndësi të veçantë siç është çerdhja e fëmijëve, është i pa-pranueshëm për ne. Një gjest i tillë nga Kuvendi Komunal tregon se institucioni më i lartë vendimmarrës vepron i ndikuar nga grupet e vogla të interesit, për qëllime e tyre të pasurimit. Më tutje është mungesa e vullnetit që të zbatohen ligjet në fuqi, të cilat nuk lejojnë një gjë të tillë". Pas disktutimeve, takimeve dhe protestave të prindërve, qytetarëve dhe aktivistëve të organizatave jo-qeveritare të Ferizjat, punimet u ndërprenë.

Reagim ndaj zhvillimeve të fundit në KK
Gjatë një konference për shtyp për vlerësimin e seancës së Asamblesë Komunale të Ferizajt, INPO konsideroi se mbledhja e fundit e asamblesë komunale ka reflektuar mungesën e stabilitetit politik që po rrezikon proceset, dhe në veçanti po huton qytetarët. U Vlerësua se deklarata e kryetarit se mbase nuk do të ketë kandidat për drejtor të drejtorive, minimizon në masë të madhe rolin thelbësor që ekzekutivi ka duke pasur parasysh që barra dhe puna që I besohet Bordit të Drejtorëve është esenciale për funksionimin e Kuvendit Komunal.
Në kohën në të cilën jemi përgatitja e territorit dhe qytetarëve për votim mbase është edhe më e rëndësishme se vetë votimi. Bordi i Drejtorëve duhet të punoj intensivisht për të ndërtuar barazi sociale e cila mungon dhe si pasojë krijohen mundësi për reagim të ashpër nga ana e qytetarëve.

INPO mbledh shefat e Grupeve Parlamentare në KK të Ferizajt
Pas situatës së krijuar në mbledhjen e Asamblesë Komunale kur nuk u vazhdua kontrata e punës 11 drejtorëve të Qeverisë Lokale të Ferizjat, INPO organizoi një takim me shefat e grupeve parlamentare të përfaqëuara në Kuvendin Komunal të Ferizajt. Në këtë takim u kërkua që ti ipet fund qeverisë oligarkike, që nuk ka pordhuar asnjë rezultat të kënaqshem përveç ngatërrimeve dhe mungesës së stabilitetit. Dhe i’u bë thirrje kryshefit të ekzekutivit, që të veprojë, për t’u siguruar se nuk do të ketë vakum institucional, që punët dhe shërbimi ndaj qyetarëve do të vazhdojë

Letër z. Joachim Ruker
INPO i dërgoi një letër Përfaqësuesit Special të Sekretarit të Përgjithshëm të Kombeve të Bashkuara, në Kosovë z.Joakim Rucker përmes së cilës u kërkua nga ai që të ndërhyj për të zgjidhur problemin e zgjedhjes së Bordit të Drejtorëve të Komunës së Ferizajt, konsideruar se përveq që mungon konsensusi politik gjithashtu mungon edhe vullneti për të krijuar stabilitet politik dhe duke parë mundësinë e thellimit të krizës institucionale, ky hap i ndërmarr nga INPO mendohet të sigurojë qëndrueshmëri institucionale deri në zgjedhjet e ardhshme lokale.

Qytetarët ferizajas po i vuajnë pasojat e mungesës së Qeverisë Lokale
Gjatë një konference për shtyp INPO reagoi ndaj gjendjes politike që po mbretëron në qytet si pasojë e mungesës së 11 drejtorëve të qeverisë lokale. Publiku ferizajas është plotësisht në terr për sa i përket zgjedhjes së drejtorëve të ri, çështje që është bërë objekt i tregtisë politike, prandaj INPO i bëri thirrje udhëheqësisë komunale që të punohet në mënyrë transparente me partitë politike për të ndërtuar një konsensus për qeverinë e ardhshme lokale, e cila duhet të përbëhet nga njerëz që kanë dëshmuar profesionalizëm, që kanë kredenciale akademike dhe vlera të larta morale, duke qenë se e vetmja zgjidhje adekuate, e qëndrueshme dhe legjitime për gjendjen aktuale është që zgjedhja e drejtorëve të bëhet duke respektuar kriteret dhe ligjin në fuqi.

INPO hap Këndin Komunal në Bibliotekën Publike të qytetit
INPO bëri hapjen publike të Këndit Komunal në Bibliotekën Publike të qytetit, në mënyrë që të lehtësojë edhe më shumë zbatimin e Ligjit për Qasje në Dokumente Zyrtare. Në këtë kënd u vendosën ligje, rregullore të miratuara në Kuvendin Komunal, proces-verbale të mbledhjeve të Asamblesë Komunale dhe vendime të miratuara në Asamble. Ky kënd do të pasurohet në vazhdimësi.
Papërgjegjësia politike e qeverisë lokale

INPO gjatë një konference për shtyp bëri apel, që të sqarohet qartazi pozicioni i Kuvendit Komunal sa i përket drejtorëve të shkarkuar, megjithëse një gjë e tillë është bërë me vendimin e 15-Majit, mirëpo duke parë hamendjet e qeverisë dhe partive politike, është i nevojshëm një deklarim i fuqishëm dhe përcaktues sa i përket drejtorëve të shkarkuar. INPO i rikujtoi Kuvendit Komunal se fatura për llogarinë e të gjitha sjelljeve të zyrtarëve të zgjedhur i takon qytetarit ta kërkojë, prandaj u kërkua të dëshmohet që ky princip fundamental i demokracisë është një normë e qeverisë sikurse edhe e partive politike të Ferizajt.

INPO takohet me deputetin e Kuvendit të Kosovës z. Bajrush Xhemaili
INPO u takua me deputetin e Kuvendit të Kosovës z. Bajrush Xhemaili për të prezantuar shqetësimet e organizatës në raport me funksionimin e qeverisë lokale si dhe marrëdhëniet ndërmjet partive politike, mungesës së transparencës në lidhje me zhvillimet politike dhe indiferencën dhe injorancën e Kuvendit Komunal ndaj vërejtjeve të shoqërisë civile.

INPO përpilon Draft-Rregulloren e Punës së KK-së

Në fund të vitit të kaluar, Kuvendi Komunal ka marrë vendim për rishqyrtimin e rregullores së punës të këtij institucioni, sikurse që ka krijuar edhe komisionin përkatës për një gjë të tillë. Duke e parë mungesën e seriozitetit dhe papërgjegjësinë e këtij komisioni, INPO ka punuar një draft-rregullore të re, të cilën e dërgoi në Kuvendin Komunal për t’u shqyrtuar.

INPO kërkon anulimin e vendimit për dhënien me koncesion të sheshit të qytetit
Përmes një letre reaguese dërguar në adresë të kryetarit, INPO kërkoi që menjëherë të bëhet pezullimi ose anulimi i konkursit për dhënien me koncesion të sheshit të qytetit. INPO konsideron se një veprim i tillë, nuk është i drejtë pasi, përveç që bie ndesh me vendimin Kuvendit Komunal, që ishte vetëm për një konkurs nga i cili do të dilnin ide, gjithashtu një hap i tillë nuk mund të merret pa u miratuar plani zhvillimor dhe urban i qytetit, për të cilin Komuna ka dhënë 130,000.00 €. Prandaj u propozua që kjo kërkesë të shqyrtohet në mbledhjen e radhës së Kuvendit Komunal si dhe të krijohet një komision ad-hoc hulumtues i Kuvendit Komunal për të bërë vlerësimin e të gjitha vendimeve të Kuvendit Komunal deri tani për dhënien me koncesion të pronave dhe pasurisë së Kuvendit Komunal.

Java kundër Korrupsionit
INPO në bashkëpunim me Qendrën e Arsimit të Kosovës organizuan Javën Kundër Korrupsionit në Ferizaj. Në kuadër të kësaj fushate u organizuan këto aktivitete:
1. Sensibilizimi i publikut dhe institucioneve me fenomenin; Korrupsion
2. Shpërndarja e broshurave, posterave, dhe ligjit kundër korrupsionit
3. Kampanjë mediale; janë realizuar dy emisione dhe është lansuar një reklamë në dy televizione
4. Emisioni “Korrupsioni: Sfidat dhe Realiteti” në TV Liria me përfaqësues të institucioneve publike dhe shoqërisë civile.
5. Emisioni “Korrupsioni: Sfidat dhe Realiteti” në Radio Ferizaj me përfaqësues të organizatave jo-qeveritare
6. Debati “Korrupsioni: Sfidat dhe Realiteti” me përfaqësues të qeverisë lokale, partive politike dhe shoqërisë civile
7. Ekspozita me punime të artisteve të rinj, që ka trajtuar luftën kundër korrupsionit.
8. Nënshkrimi i deklaratës kundër korrupsionit dhe
9. Hartimi i raportit për vlerësimin e zbatimit të ligjit kundër korrupsionit që u është dërguar të gjitha institucioneve relevante, që janë përgjegjëse për të luftuar këtë fenomen.

Performanca ‘’Pitja e Korrupsionit’’
INPO realizoi performancën ‘’Pitja e Korrupsionit’’ në sheshin e qytetit, duke aluduar kështu në mënyrë simbolike në shpërndarjen e korrupsionit në sfera të ndryshme të jetës. Qëllimi i kësaj performance ishte shprehja e pakënaqësisë me indiferencën e qeverisë kundrejt problemit të Korrupsionit dhe mungesën e rezultateve të kënaqshme në luftën kundër korrupsionit.

INPO propozon disa prioritete për buxhetin 2008-2010 të KK të Ferizajt
Përmes një shkrese dërguar Kryeshefit të Ekzekutivit të Kuvendit Komunal të Ferizajt, INPO kërkoi futjen e disa prioriteteve në buxhetin e Kuvendit Komunal të Ferizajt për vitet 2008-2010, që janë nxjerr pas konsultave dhe bisedave me qytetarë ferizajas. Sipas qytetarëve prioritete që duhet të futen në kuadër të linjës buxhetore “Investime Kapitale” duhet të jenë: Përkrahja e Bujqësisë, Siguria në rrugë, Përmirësimi i kushteve nëpër shkolla dhe gjelbërimi i qytetit.

Paratë e taksa-paguesve të shfrytëzohen në mënyrë racionale e jo të sponsorizojnë udhëtime turistike
INPO dërgoi një letër reaguese në adresë të Kryetarit të Kuvendit Komunal të Ferizajt për të shprehur shqetësimet e saj përkitazi me vizitën e fundit të një grupi të këshilltarëve të Kuvendit Komunal në Shqipëri, duke vlerësuar se çdo veprim i Kuvendit Komunal duhet të jetë i mbështetur në arsye dhe të jetë racional. INPO kërkoi që paratë e taksa paguesve të mos shpenzohen për të sponsorizuar vizita të tilla të cilat nga shumica e shoqërisë civile janë vlerësuar si udhëtime turistike.

Publikimi i Raportit të Vlerësimit të Zbatimit të Ligjit Anti-Korrupsion
INPO bëri publikimin e raportit për zbatimin e Ligjit Kundër Korrupsionit. Ky punim është përgatitur me qëllim që të kontribuoj në luftën kundër korrupsionit në Kosovë, gjegjësisht në nivelin lokal, për komunën e Ferizajt. Raporti shtjellon përhapjen e korrupsionit në komunën e Ferizajt duke u mbështetur në raportimet e medias, punën e institucioneve lokale për të luftuar këtë fenomen si dhe bashkëpunimin e tyre me shoqërinë civile.

Qendra Rinore e Ferizajt – vend dasmash e ahengjesh familjare
Përderisa në Qendrën Rinore të Ferizajt mungojnë aktivitetet kulturore për të rinj, aty nuk mungojnë dasmat e ahengjet familjare. Duke parë këtë si një shqetësim serioz INPO dërgoi një reagim në adresë të Kryeshefit të Ekzekutivit të Ferizajt duke vlerësuar se të rinjtë e komunës sonë, ballafaqohen me probleme shumë të mëdha, dhe ju mungojnë shërbimet për edukim jo formal dhe aktivitete rekreative që do të fuqizonin kapacitetet e tyre; prandaj u kërkua që të ndalohet organizimi i aktiviteteve me qëllime profitabile në lokalet e qendrës rinore, siç janë dasmat dhe ahengjet ku në fakt të rinjtë nuk edukohen për së mbari por edukohen për gjëra negative të shoqërisë dhe ju shërbejnë për muzikë pa vlerë (tallava).

Takimi publik i Kuvendit Komunal; Mashtrim i qytetarëve
Gjatë një takimi publik të organizuar nga Kuvendi Komunal INPO nuk mori pjesë duke vlerësuar se ‘’këto takime janë shumë të rëndësishme po qese merren seriozisht dhe respektohen rekomandimet dhe përfundimet e këtyre takimeve. Mirëpo në praktikën e qeverisë ferizajase kjo nuk ndodh pasi që vendimet janë marr tanimë dhe këto takime me qytetarë janë vetëm një kamoflazhë dhe krijim i përshtypjes së gabuar për dëgjueshmërinë e qeverisë. Kjo është një dyfytyrësi e neveritshme e cila gjithashtu reflekton një krizë morale dhe të edukatës qytetare e demokratike e cila vetëm sa po ndihmon në rritjen e mosbesueshmërisë dhe humbjen e kredibilitetit ndaj kryetarit të Kuvendit Komunal’’.

INPO në mënyrë simbolike ‘’mbyll’’ Kuvendin Komunal
INPO realizoi një performansë reaguese para Kuvendit Komunal, duke e mbyllur këtë institucion në mënyrë simbolike, pasiqë siç duket në praktikë, ky institucion ka pushuar aktivitetin e vet në përfaqësimin e interesave të qytetarëve ferizajas. Në hyrje të komunës u vendosen disa parulla që edhe zyrtarisht i japin këtij institucioni ‘’pushim’’. Ndërsa hyrja e këtij institucioni u mbyll me zingjir letre.

Kërcënon LDD-ja
INPO në kuadër të projektit ‘’Për zgjedhje të lira dhe të ndershme’’, gjatë muajit shtator ka bërë hulumtinin e biografive të kandidatëve për kryetarë komune dhe të atyre që kandidojnë për këshilltarë komunalë. Në kohën kur INPO, ka përfunduar këtë fazë, raportet me emrat e kandidatëve, biografitë e të cilëve nuk kanë qenë të pastra, iu janë dërguar partive politike, Lidhja Domkratike e Dardanisë, nuk është pajtuar me të gjeturat në biografitë e kandidatëve të saj. Kjo parti si kundërpëgjigjje ka dërguar një letër, e cila për mendimin e INPO dhe të ekspertëve të drejtësisë konsiderohet se ka përmbajtje kërcënuese. INPO dënoi rëndë këtë gjest të LDD-së, dhe është e indinjuar me gjuhën me të cilën kjo parti ka zgjedhur të ndërtoj raporte me shoqërinë civile

Dita ndërkombëtare kundër Korrupsionit – Pastrohuni o qeveritarë, po u vie era korrupsion
Në ditën Ndërkombëtare kundër Korrupsionit, INPO realizoi një performancë me moton ‘’Pastrohuni o qeveritarë, po u vie era korrupsion’’. INPO me këtë rast në mënyrë simbolike bëri pastrimin e disa rrobave të ndyera, duke aluduar në atë se qeveriatërt tanë duhet të pastrohen nga korrupsioni dhe të luftojnë atë në të gjitha mënyrat për të pasur shërbime sa më të mira dhe për t’i ofruar qytetarëve një jetë më cilësore.

Takim me Partitë Politike: Hulumtimi i Biografive të Kandidatëve për Këshilltarë Komunal dhe Kryetar Komune
INPO realiozi një takim me partitë politike të Ferizajt për t’i njoftuar me fazën e projektit që ka të bëj me hulumtimin e kandidatëve që pretendojnë ulëse në Kuvendin Komunal dhe të atyre që kandidojnë për Kryetar Komune. Në takim u caktuan kriteret që duhet të plotësojnë kandidatët që të quhen ‘’të padenjë’’ për të qenë në përbërjen e re të Kuvendit Komunal. Në fund të takimit u nënshkrua një ‘’marrëveshje mirëkuptimi’’, në të cilën kryetarët e paprtive politike zotohen që të marrin parasyh të gjeturat e INPO-së dhe që të ketë një fushatë sa më demokratike.

Krijimi i grupit të hulumtuesve, përgatitja e raportit të parë dhe rishqyrtimi i raportit
Menjëherë, pas marrjes së dritës së gjelbër zyrtare nga ana e partive politike, për ti hulumtuar kandidatët e tyre, stafi i projektit, i ka bërë ftesë dy hulumtuesve profesionist, për të hulumtuar mbi veprimtarinë publike të, kandidatëve të partive politike. Raportii i parë, i është dërguar partive më 04 Tetor, këto të fundit kanë pasur në dispozicion një javë kohë, që të hartojnë përgjigjet e tyre dhe të arsyetojnë kandidatët e tyre. Prej të gjitha partive, sa kanë pasur kandidatë të “pa-denjë”, një prej tyre është pajtuar në heshtje me argumentet dhe faktet që ne kemi ofruar, ndërsa të gjitha partitë tjera kanë kthyer përgjigje me shkrim dhe disa edhe kanë arsyetuar kandidatët e tyre, që si rrjedhim ka pasuar edhe heqja e atyre kandidatëve nga lista e të “pa-denjëve” për poste publike. Të gjitha partitë kanë përdorur, gjuhë korrekte të komunikimit profesional, me përjashtim të partisë LDD, e cila tentoi që të dëmtojë nismën, duke na quajtur “shpifës”, “të shitur”, madje në ca raste edhe duke na kërcënuar në një apo formë tjetër. Nga 23 persona sa kishte në fillim raporti i hulumtimit, në mesin e të cilëve edhe një kandidat për kryetar, pas rishqyrtimit dhe pas marrjes së përgjigjeve nga partitë politike, ai u reduktua në 9 persona të cilët do të mbesin në raportin përfundimtar.

Vizitë e përbashkët e INPO –se me kandidatët për kryetar komune të Ferizajt
INPO së bashku me kandidatët për keytarë komune nga radhët e PDK-së, LDK-së, AAK-së, ORA-s, AKR-së dhe PD-së, vizituan disa pjesë të qytettit që për mendimin e shoqërisë civile të Ferizajt duhet të jenë ndër prioritetet kryesore të kryetarit të ardhshëm të komunës së Ferizajt. Me këtë rast u vizituan : Hekurudha e qytetit, Qendra e Banimit Kolektiv(ish-Barakat) , Bifurkacioni dhe fshati Jezerc.

Fushata “Shkrepe Votën”
Kampanja “Shkrepe Votën”, ka synuar të arrijë disa qëllime, në radhë të parë nxitjen e qytetarëve për të dal në zgjedhjet e 17 Nëntorit, ofrimin e tyre sa më afër kandidatëve të tyre, edukimin për rëndësinë e daljes në zgjedhje si dhe mënyrën e votimit. Fushata në fokus të saj ka pasur, të rinjtë. Kjo fushatë në vete, ka përfshirë disa aktivitete:
1. Punëtoritë “Unë votoj për herë të parë”,
2. Debatet me kandidatët për kryetar komune,
3. Reklama televizive,
4. Shtypja dhe shpërndarja e posterëve, stickersave, micave e materiale të tjera promovuese të fushatës,
5. Karvani,
6. Koncerti “Shkrepe me Rock”

Punëtoritë “Unë votoj për herë të parë”
Janë realizuar 5 punëtori, me nga 30 pjesëmarrës secila.. Punëtoritë kanë qenë në formë interaktive, ku u është lënë hapësirë për diskutim, të rinjve pjesëmarrës, të cilët, për herë të parë do të merrnin pjesë në zgjedhje. Në këto punëtori është diskutuar për rëndësinë e votës, sepse përmes saj, ata do të zgjedhin njerëzit që do ti përfaqësojnë, gjithashtu është diskutuar edhe për mënyrën e votimit, meqë në zgjedhjet e 17 Nëntorit, do të aplikohej metoda e zgjedhjeve me lista të hapura, metodë kjo më e komplikuar se metodat e mëparshme dhe në këtë mënyra kërkonte që votuesi të edukohej paraprakisht, për mënyrën e votimit. Gjithashtu një pjesë e kohës është fokusuar në aktivizmin rinor, në mënyre që të rinjtë të edukohen, për rëndësinë e të qenit qytetar aktiv në një shoqëri demokratike.

Debatet me kandidatët për kryetar komune
Janë realizuar 4 debate publike, 3 prej të cilave me kandidatët për kryetar komune të 3 komunave që ka përfshi projekti dhe 1 me kandidatët për deputetë në asamblenë komunale të Ferizajt. Debatet kanë zgjatur rreth 2 orë, gjatë së cilës kohë, kandidatët kanë pasur mundësi, që para audiencës prezente, të prezantojnë platformat e tyre politike, planet e tyre konkrete për zgjidhjen e problemeve të qytetarëve dhe strategjitë tjera për zhvillimin e komunave, udhëheqjen e të cilave synonin që ta fitonin në zgjedhjet e 17 Nëntorit.

Karvani
5 ditë para mbajtjes së zgjedhjeve, një kamion i dekoruar, ka shëtitur nëpër tërë regjionin e Ferizajt, më konkretisht në Ferizaj, Shtime, Kaçanik, Shtërpcë dhe Hani i Elezit. Gjatë periudhës sa Karvani ka qëndruar nëpër qytetet përkatëse, aktivistët u kanë shpërndarë broshura, me shpjegimet e nevojshme, për rëndësinë dhe mënyrën e votimit, gjithashtu aktivistët gjatë kësaj kohe edhe kanë bashkëbiseduar me qytetarë të rastit, të cilët i kanë inkurajuar që të dalin në zgjedhje. Karvani gjatë tërë kohës është përcjell me muzikë, e cila ka tërhequr vëmendjen e qytetarëve.

Koncerti “Shkrepe me Rock”
Krejt në fund, në përmbyllje të fazës së parë, apo të fushatës, për të nxitë qytetarët që të marrin pjesë në zgjedhje, është mbajtur një koncert i madh, me grupin e mirënjohur “Kthjellu”, gjatë së cilës kohë, pjesëmarrësit përveç që u argëtuan edhe morën porosinë që të nesërmen të dalin në zgjedhje.

Hulumtimi i Biografive të Kandidatëve për Deputetë të Kuvendit të Kosovës INPO gjatë vitit 2007, ka qenë pjesë e Koalicionit të OJQ-ve ‘’Shoqëria Civile për Parlament të Pastër’’. Në kuadër të këtoj koalicioni përgjegjësia e INPO-s kanë qenë regjionet e Ferizajt dhe Gjilanit, përkatësisht komunat e Ferizajt, Shtimes, Kaqanikut, Gjilanit dhe Kamenicës. Në kuadër të këtij projekti, është bërë hulumtimi i biografive të kandidatëve të komunave përkatëse që kanë synuar postin e Deputetit të Parlamentit të Kosovës. INPO ka rekrutuar një staf profesionistës të cilët gjatë një periudhe dy-mujore, kanë hulumtuar biografitë e kandidatëve që kanë kandiduar nga komunat që kanë qenë në domenin e përgjegjësisë së INPO-s. Në mesin e muajit Nëntor është bërë shtypja e broshurave me rezultatet e këtij hulumtimi dhe qytetarët kanë mundur të dijnë më shumë për personat të cilët kanë këkruar votën e tyre.

‘’Fuqizimi i Ndikimit Publik në Vendim-marrje’’ – Nisma e të Rinjve për të Drejtat e Njeriut
“Sfidat për zbatimin e ligjit për qasje në dokumente zyrtare”
Në debatin “Sfidat për zbatimin e ligjit për qasje në dokumente zyrtare”, morën pjesë përfaqësues të institucioneve publike, përfaqësues të OJQ-ve, mediave dhe aktivist të tjerë të shoqërisë civile. Pjesëmarrësit e debatit pas diskutimeve të shumta, e sidomos përfaqësuesit e institucioneve publike të Ferizajt u zotuan për punë më të madhe në implementimin e këtij ligji sepse të gjithë ishin të pajtimit se zbatimi i këtij ligji i ndihmon më së shumti kyçjen e qytetarëve në proceset vendimmarrëse, faktor ky, shumë i rëndësishëm për ngritjen institucionale dhe demokratike. Ndërsa nga shoqëria civile rrodhi ideja e krijimit të rregulloreve komunale, përcjellëse të këtij ligji, që do të ndihmonin zbatimin e ligjit në nivel komunal dhe sidomos do të sqaronte dhe specifikonte kategorizimin e informacioneve.

"Fuqizimi i ndikimit të publikut në vendimmarrje"
Në këtë debat që u mbajt me përfaqësuesit e OJQ-ve nga komuna e Ferizajt, u diskutua mbi rëndësinë e pjesëmarrjes e publikut në procesin vendimmarrës, shkaqet e pjesëmarrjes së ulët të qytetarëve në këtë proces si dhe mënyrën e fuqizimit të ndikimit të publikut në vendimmarrje. Nga pjesëmarrësit e pranishëm në debat, u bë e ditur, se niveli i pjesëmarrjes së publikut në vendimmarrje, është shumë i ulët dhe arsyeja kryesore, për këtë gjë, është humbja e besimit të qytetarëve, ndaj institucioneve vendimmarrëse dhe nga përshtypja se, edhe përkundër pjesëmarrjes së tyre asgjë nuk po ndryshon.

Video-klipi ‘’Ferizaj – Pa koment’’
Video-klipi ‘’Ferizaj – Pa Koment’’ u përgatit nga dy të rinj ferizajas, të angazhuar nga INPO dhe bazohej në pamje të marrura nga aspekti social, ekonomik dhe politik i qytetit të Ferizajt. Ndërsa qëllimi i këtoj video-klipi ishte që t’i bëhet thirrje qeverisë lokale dhe institucioneve relevante që të punojnë në përmirësimin e kualitetit të jetës së qytetarëve ferizajas.

ALO KOMUNA: Linjë telefonike për qytetarët
INPO në bashkëupin me Kuvendin Komunal të Ferizajt-Zyra për Informim dhe Post Telekomine Ferizajt- Filiali në Ferizaj, bëri vendosjen e një linje telefonike për qytetarët që do të shfrytëzohet nga ta për gjetjen e adresës së duhur për zgjidhejn e problemeve të tyre dhe marrjen e përgjigjjeve që u nevoiten atyre.

Koalicioni ‘’Demokracia në Veprim
INPO si pjesë e koalicionit ‘’Demokracia në Veprim’’, mbuloi regjionin e Ferizajt, përkatqësisht komunat e Ferizajt, Shtimes, Kaqanikut dhe Shtërpcës. Gjatë kësaj kohe u bë monitorimi i fushatës zgjedhore në katër komunat gjegjëse. Ndërsa si pjesë e koalicionit dhe projektit ‘’Për Zgjedhje të Lira dhe të Ndershme’’ u bë edhe monitorimi i procesit zgjedhor të zgjedhjeve të 17 Nëntorit dhe balotazhit të 8 Dhjetorit dhe ka pasur në këto dy ditë të angazhur 228 vëzhgues.

Publikimet

ProD

© Copyright 2009, INPO. All Rights Reserved.